Mar 3 | KPG | STEP | Jesus ga hanimoi gi muli gi synagogee, gei taane made dono lima i golo.

a 3.9-10:Mk 4.1; Lk 5.1-3

c 3.22:Mt 9.34, 10.25

d 3.29:Lk 12.10

Mark 3

Taane made dono lima

(Matthew 12.9-14; Luke 6.6-11)

1 Jesus ga hanimoi gi muli gi synagogee, gei taane made dono lima i golo. 2 Hunu gau i golo e dadaumada a Jesus, bolo gi gida di nadau mee hala i mee. Digaula ga mmada adu gi donu be mee ga hagahili taane deelaa i di Laangi Sabad. 3 Jesus ga helekai gi taane, “Hanaga gi mua.” 4 Gei mee ga heeu gi digaula, “Tadau haganoho le e dumaalia gi ni aha e hai go gidaadou i di Laangi Sabad? Di humalia be di huaidu? E benebene di mouli o tangada, be e hagahuaidu?”

Gei digaula digi helekai loo. 5 Jesus gu hagawelewele gi digaula, gei di madagoaa la hua mee gu tilikai hua laa i digaula, idimaa i nadau lodo hamaaloo mo nadau hagabaubau ihala. Gei mee ga helekai gi taane deelaa, “Holohia doo lima gi daha.” Gei mee ga holo dono lima gi daha, gu hili. 6 Nia Pharisee ga ulu gi daha mo synagogee, ga dagabuli ginaadou mo digau ala e huli mai i Herod, e haga noho di nadau hai belee daaligi a Jesus.

Digau dogologo i baahi di tai

7 Jesus mo ana dama agoago ne loo adu gi tongotai di Tai o Galilee, gei digau dogologowaahee ne daudali a mee. Digau aanei digau mai Galilee, Judea, 8 Jerusalem, nnenua o Idumea, i baahi i dua o Jordan, mo mai i nia gowaa i di gili nia waahale o Tyre mo Sidon. Digau huogodoo aanei ne loomoi gi Jesus i di nadau longono i nia mee a Jesus ala ne hai. 9 Tagabuulinga dangada deelaa gu dogologowaahee, ga hidi ai Jesus, ga helekai gi ana dama agoago gi hagatogomaalia ina di boodi e gaga ieia, gi aadee ia. ^a 10 Mee ne hagahili ana gau dogologo, gei digau magi e hagadau honohono, bolo gi bili ginaadou gi mee. 11 Digau ala iai nia hagataalunga huaidu ga gidee ginaadou a mee, ga pala loo gi lala i mua o mee, ga wwolo, “Goe go Tama a God!” 12 Jesus ga bule nia hagataalunga huaidu aalaa, bolo gi hudee hagi anga ia gi nia daangada.

Jesus e hili digau agoago dilongoholu maa lua

(Matthew 10.1-4; Luke 6.12-16)

13 Jesus ne hana gi hongo dahi gonduu, ga gahi ana gau ala e hiihai ginai, gei digaula gu hula gi mee. 14 Gei mee ga hilihili aga dilongoholu maa lua, ga haga ingoo go mee bolo digau agoago hagau. Mee ga helekai, “Au ne hili goodou belee madalia au, e hagau goodou e hagadele di Longo Humalia. 15 Goodou ga mogobuna di hagabagi nia hagataalunga huaidu.” 16 Aanei digau dilongoholu maa lua a mee ne hilihili: Simon (Jesus gu wanga di ingoo o maa go Peter), 17 James, mo dono duaahina go John, nia dama ni Zebedee (Jesus gu haga ingoo meemaa bolo Boanerges, dono hadinga boloo: nia dama daane ni di atili), 18 Andrew, Philip, Bartholomew, Matthew, Thomas, James go tama daane a Alphaeus, Thaddaeus, Simon tangada haamanawa i dono henua (“Patriot”), ^{▼▼3.18“Patriot” Di hagabuulinga dangada ala e hai baahi hagammuni gi digau o Rome} 19 mo Judas Iscariot, dela ne hagi anga Jesus.

Jesus mo Beelzebul

(Matthew 12.22-32; Luke 11.14-23; 12.10)

20 Jesus ne hana gi dono hale, gei digau dogologo ga mmui mai gi mee, gei mee mo ana dama agoago gu de aadee di nadau miami. 21 Nia gau o maa ga longo, ga hula belee benebene a mee, idimaa, nia daangada e helekai bolo mee gu dadaaulia. 22 Digau haga dondonu haganoho ne loomoi i Jerusalem, ga helekai, “Beelzebul la gu i lodo o mee, di tagi o nia hagataalunga huaidu, ne hai a mee gi mogobuna di hagabagi digaula.” ^c 23 Jesus ga gahi mai digaula, ga helekai nia ala kai, “Satan e mee di hagabagi Satan? 24 Tenua ma ga waewae hagabuulinga, la ga heheebagi, ga mooho gi daha. 25 Maa di madahaanau ma ga waewae, ga heheebagi, di madahaanau deelaa la ga mooho. 26 Maa nei bolo nia daangada o Satan la ga waewae hagabuulinga, la hagalee duai, ga hagalee. 27 Deai tangada e mee di ulu gi lodo di hale o taane maaloo belee kae nia goloo o maa. Go mee hua gu lawalawa taane maaloo, gei mee ga mee laa di kae ana goloo i di hale o maa. 28 Au e hagi adu di tonu bolo nia huaidu huogodoo o nia daangada mo nadau helekai huaidu i God, e mee hua di dumaalia ginai. 29 Gei tangada dela ma ga helekai huaidu i di Hagataalunga Dabu le e deemee di dumaalia ginai, idimaa, mee gu doo gi di hala dela e deemee di mehede. ^d 30 Jesus e helekai beenei, idimaa, hunu daangada ne helekai, “Mee iai di hagataalunga huaidu i ono lodo.”

Tinana o Jesus mo ono duaahina

(Matthew 12.46-50; Luke 8.19-21)

31 Nia duaahina daane o Jesus mo tinana o maa ne dau mai. Digaula e tuu i malaelae di hale, ga hagau di nadau hagailoo, belee gahi mai a mee. 32 Digau dogologo i baahi o Jesus, ga helekai gi mee, “Mmada, doo dinana, oo duaahina daane, oo duaahina ahina i malaelae, e hiihai e heetugi adu.” 33 Gei Jesus ga helekai gi digaula, “Dogu dinana la koai? Ogu duaahina la koai?” 34 Mee ga mmada adu hua gi digau ala e noho i dono baahi, ga helekai, “Mmada! Aanei ogu dinana mo ogu duaahina! 35 Be ko ai hua dela e hai nia mee a God gi heia, deelaa dogu duaahina daane, dogu duaahina ahina, mo dogu dinana.”